Иш-чарага Министрлер кабинетинин орун басары Эдиль Байсалов, билим берүү министри Догдуркүл Кендирбаева, ошондой эле илим, жогорку билим берүү жана инновациялар министри Гульзат Исаматова жана педагогикалык жогорку окуу жайларынын жетекчилери катышты.
Жыйындынын негизги темалары педагогикалык кадрларды даярдоо, алардын квалификациясын жогорулатуу, жаңы мамлекеттик жана предметтик стандарттарды киргизүү, ошондой эле методикалык жана педагогикалык колдоону күчөтүү зарылдыгы болду.
Ошондой эле эл аралык менторлорду жана тренерлерди тартуу, педагогикалык адистиктер боюнча окуган студенттерди колдоо жана STEM тармагында англис тилин билген мугалимдерди даярдоо маселелери талкууланды.
Эдиль Байсалов мугалимдин билим берүү системасындагы ролунун маанилүүлүгүн белгилеп, педагогикалык кадрларды өнүктүрүү мамлекеттик саясаттын артыкчылыктуу багыттарынын бири болушу керек экенин айтты. Ал ошондой эле бардык кызыкдар тараптардын координацияланган аракеттерине чакырды.
Өз кезегинде министр Кендирбаева педагогдорду даярдоо системасын глобалдык билим берүү мейкиндигине интеграциялоо зарылдыгын белгиледи. Анын айтымында, педагогикалык университеттер алдыдагы реформаларда алдыңкы мекемелер жана лидерлер болушу керек.
