Бишкекте мамлекеттик тилдин кызмат көрсөтүү жана жарнамадагы колдонулушу боюнча талкуу болду. Бул тууралуу шаардык мэрия маалымдады.
2026-жылдын 5-февралында Свердлов районунда калкты тейлөө борборлорунун жетекчилери жана өкүлдөрү, ЗАГС органдары, ошондой эле ири соода жана көңүл ачуу комплекстеринин, сулуулук салондорунун, банктардын, базарлардын, кафе жана ресторандардын, мейманканалардын, спорттук мекемелердин, кинотеатрлардын, типографиялардын жана дүкөндөрдүн өкүлдөрү катышкан жыйын өттү.
Күн тартибинде мамлекеттик тил боюнча мыйзам нормаларын сактоо, ошондой эле бул тилдин визуалдык материалдарда жана жарнама продукциясында колдонулушу боюнча маселелер каралды. Мамлекеттик тилдеги тексттерди жергиликтүү аткаруу органы менен макулдашуу зарылдыгы талкууланды.
Иш-чарага мамлекеттик тил жана тил саясаты боюнча Улуттук комиссиянын төрайымы Мелиса Мураталиева, бөлүм башчысы Алмагуль Телекманова, жетекчи адис Айнура Сооронбаева, талдоо жана мониторинг бөлүмүнүн башчысы Гульнур Капарова, ошондой эле Бишкек мэриясында мамлекеттик тил боюнча бөлүм башчысы Эльвира Ниязбекова катышты.
Катышуучуларга кызмат көрсөтүү тармагында иш алып барган уюмдардын мамлекеттик тилдин ролун күчөтүүгө багытталган практикалык кеңештер берилди.
