Нарын шаарында Кыргыз Республикасынын Эмгек, социалдык камсыздоо жана миграция министри Канат Сагынбаевдин ОВЗ бар балдарга кызмат көрсөтүүчү «Мейкин» реабилитациялык борборундагы ата-энелер менен жолугушуусу болуп өттү.
Ведомствонун маалымат кызматы билдиргендей, аталган борбор психикалык бузулуулары бар балдарга жана ден соолук мүмкүнчүлүктөрү чектелген жаштарга ар тараптуу колдоо көрсөтүп, ата-энелерди окутуп, жеке жардамчыларды даярдайт, бул реабилитациялык кызматтардын сапатын жана жеткиликтүүлүгүн жакшыртууга жардам берет.
Жолугушуу учурунда ата-энелер реабилитациялык борборлорду ар бир облуста түзүү, жалпы билим берүү мектептеринде билим берүү программаларын адаптациялоо, мугалимдердин санын көбөйтүү жана алардын айлык акысынын жогорулашы, ошондой эле мүмкүнчүлүгү чектелген балдарды тарбиялаган жалгыз бой энелерге колдоо көрсөтүү сыяктуу маанилүү маселелерди талкуулашты. Ошондой эле, ар кандай аймактарда өзгөчө балдар үчүн спорттук жана эс алуу программаларын өнүктүрүү маанилүү маселе болуп калды.
Канат Сагынбаев реабилитациялык кызматтарды өнүктүрүү мамлекеттин артыкчылыктуу милдети экенин белгилеп, ата-энелерди жана коомдук уюмдарды демилгелерди түзүү жана ишке ашыруу үчүн бейөкмөт уюмдардын ишмердүүлүгү аркылуу активдүү кызматташууга чакырды.
Министр ошондой эле ата-энелер мамлекеттик социалдык заказ механизмине активдүү катышып, НКО жана социалдык коргоо органдары менен биргеликте долбоорлорду иштеп чыгып, мамлекеттик колдоо алуу үчүн тапшырууларды бериши керектигин белгиледи.
«Биз жергиликтүү демилгелердин реалдуу долбоорлорго айлануусун, балдардын жана алардын үй-бүлөлөрүнүн жашоосун өзгөртө турган долбоорлорду ишке ашырууну каалайбыз», - деп кошумчалады министр. ```
