Кыргызстандын борбору Бишкекте, курулуш нормаларына жооп бербегендиги үчүн курулушчу 400 миң сомго айыпка жыгылды, деп билдирди Курулуш министрлиги.
Текшерүүнүн жүрүшүндө 9 кабаттуу турак жай комплексин Н. Коперник көчөсү, 26/1 дарегинде жана 14 кабаттуу турак үйдү Ж. Баатыр көчөсү, 50а дарегинде куруу учурунда олуттуу бузуулар болгондугу аныкталды.
Атап айтканда, объекттин бирдиктүү паспорту жок болчу жана коопсуздук техникасынын талаптары сакталбай калган, бул КРдин курулуш нормаларын бузуу болуп саналат.
Текшерүүнүн жыйынтыгы боюнча акт түзүлдү жана курулушчуга аныкталган кемчиликтерди жоюу боюнча буйрук берилди. Бул акттын негизинде компанияга 400 миң сом айып пул салынды.
