Фильм Т. Океев атындагы Улуттук кино студиясы «Кыргызфильм» тарабынан иштелип чыккан.
Картинада Улуу Ата Мекендик согуш учурундагы адамдын тагдыры тууралуу баяндалат. Башкы каарман, кыргыз жоокери, немис аскерлеринин колуна түшүп, Грета аттуу медайым менен таанышып, кийинчерээк үй-бүлө курат. Согуш аяктагандан кийин алар Германиядагы Розенберг айылына жайгашышат. Каарман өмүр бою мекенине болгон сагынычын сезип, жыл сайын Кыргызстандагы жакындарына кат жиберет, бирок узак убакыт бою жооп албайт. 43 жылдан кийин ал өзүнө чыккынчылык кылгандыгы тууралуу билдирүү алат жана мекенинде эч ким аны күтпөйт экен. Бул кабар анын руханий соккусуна айланат, кийинчерээк ал КГБ тарабынан жасалма экендиги аныкталат.
«Туткун» мекенге болгон сүйүү, адамдын тагдыры, тарыхый адилетсиздик жана руханий трагедия темаларын терең изилдеген драмалык чыгарма болуп саналат, деп белгилейт басма сөз кызматы.
Фильмдин премьерасы Улуу Ата Мекендик согуштагы Жеңиштин 80 жылдыгына арналган иш-чаралардын алкагында жана 2022-2026-жылдарга карата жеке адамдын руханий-ахлактык өнүгүүсү жана физикалык тарбия концепциясынын иш-чаралар планына ылайык өтөт.
