Наджиб Разак бир нече кылмыштарга, анын ичинде акча жуу, бийликти кыянаттык менен пайдалануу жана мамлекеттик каражаттарды мыйзамсыз ээлеп алуу боюнча күнөөлүү деп табылды. Сот ага 13,5 миллиард ринггит өлчөмүндө айып пул салды, бул болжол менен 3,3 миллиард долларга барабар.
Интернеттен алынган сүрөт. Наджиб Разак
Associated Press маалыматтарына ылайык, көрсөтүлгөн суммадагы 11,4 миллиард ринггит бийликти кыянаттык менен пайдалануу үчүн айып пул катары белгиленсе, 2,08 миллиард ринггит акча жуу боюнча мыйзамга ылайык төлөнүшү керек.
Наджибдин адвокаттары бул өкүмгө каршы арыз берүүнү пландап жатканын билдиришти.
Наджиб Разак 2009-жылдан 2018-жылга чейин Малайзиянын премьер-министри болуп кызмат өтөгөнүн белгилеп өтүү керек. 1MDB иши анын саясий кулашынын жана кийинки кылмыш иштери боюнча териштирүүлөрдүн негизги себептеринин бири болду.
1Malaysia Development Berhad (1MDB) фонду 2009-жылы Малайзиянын экономикалык өсүшү үчүн мамлекеттик инвестициялык инструмент катары кызмат кылуу максатында негизделген.
Эл аралык териштирүүлөр бул фонддон 4,5 миллиард доллардан ашык каражат уурдалганын аныктады. Каражаттар офшордук компаниялар аркылуу жана чет өлкөдөгү банк эсептерине чыгарылып, ошондой эле кыймылсыз мүлк, люкс товарларды сатып алуу жана эл аралык долбоорлорду каржылоо үчүн колдонулган. 1MDB иши АКШ, Швейцария, Сингапур жана башка өлкөлөрдө териштирилүүдө.
Бул скандал дүйнөлүк тарыхтагы эң ири коррупциялык скандалдардын бири катары эсептелет.
