Суу ресурстары, айыл чарба жана кайра иштетүү өнөр жайы боюнча биринчи орун басары Жаныбек Керималиев буга чейин аталган долбоорду ишке ашыруу үчүн донорлор $30 миллион кредит жана $1,79 миллион грант берерин белгилеген.
«Бул демилге абдан амбициялуу болуп, адамдардын жана жаныбарлардын ден-соолугун жакшыртууга, ошондой эле айлана-чөйрөнү коргоого багытталган. Долбоордун биринчи этабы үч негизги компонентти камтыйт, алар кадимки шарттарда системанын базалык потенциалын түзүү жана бекемдөө, ошондой эле «Бирдиктүү ден-соолук» регионалдык программасынын концепциясы алкагында өзгөчө кырдаалдарга жооп берүү жана аны аныктоо боюнча критикалык маанидеги функцияларды колдоо үчүн иштелип чыккан. Бул компоненттердин ортосундагы байланыштын маанилүүлүгүн жана ден-соолук тармагындагы глобалдык маселелерди чечүүгө комплекстүү мамиле жасоонун зарылдыгын баса белгилейт», — деди Керималиев.
Жаныбек Керималиевдин айтымында, долбоордун негизги багыттары зооноздук инфекциялар менен күрөшүү, антимикробдук каражаттарга туруктуулукту алдын алуу жана тамак-аштын коопсуздугун камсыз кылуу болуп саналат.
Депутаттар талкуусуз документ долбоорун экинчи окууда жактырышты.
