Бул долбоор пандемияларды алдын алуу, азык-түлүк системаларын бекемдөө жана Борбордук Азиядагы экосистемалардын ден соолугун коргоого багытталган. Келишим 2025-жылдын 11-июлунда Бишкекте Кыргыз Республикасы менен Эл аралык өнүктүрүү ассоциациясы жана пандемияларга каршы алдын алуу жана жооп берүү үчүн атайын фонддун администратору катары кызмат өтөгөн Эл аралык реконструкция жана өнүктүрүү банкынын ортосунда кол коюлган.
Бул мыйзам долбоорунун демилгечиси өкмөт башчы болуп саналат. Суу ресурстары, айыл чарба жана кайра иштетүү өнөр жайы министринин орун басары Жаныбек Керималиев мыйзамдын максаты калктын жана жаныбарлардын ден соолугун жакшыртуу, ошондой эле өлкөдөгү айлана-чөйрөнү коргоо экенин белгиледи.
Керималиевдин айтымында, «Фаза 1» долбоору үч негизги компонентти камтыйт: зооноздук инфекциялар менен күрөшүү, антимикробдук препараттарга туруктуулукту алдын алуу жана азык-түлүктүн коопсуздугун камсыздоо.
«Фаза 1» долбоорун ишке ашыруу үчүн финансылык келишимге ылайык 30 миллион доллар кредит түрүндө, ошондой эле гранттык келишимдин алкагында 1,79 миллион доллар бөлүнөт. Кредит 50 жылга, 10 жылдык жеңилдик мезгили менен жана 0% пайыздык ставкага берилет.
