Бизнесмен акыркы жылдарда беш операция, инсульт жана жүрөк-кан тамыр системасы менен байланышкан көйгөйлөрдү башынан өткөргөнүн айтты.
Абдыкеримов Кыргызстандагы революция анын жашоосун түп-тамырынан өзгөртүп жибергенин билдирди. Анын айтымында, ал бизнесин, ден соолугун жана үй-бүлөсүн жоготуп, Лондондо жалгыз калды.
"Өмүр менен өлүмдүн чегинде турганда, дүйнөнү башкача кабыл ала баштайсың", - деп жазат ал. Өзүнүн 30 жылдык бизнесинин ичинде, миңдеген адамдарды жумуш менен камсыз кылганын, ал эми үч жылдын ичинде баары кыйраганын айтты.
Кайрылуусунда ал ишеним арткан адамдар тарабынан саткындык тууралуу да сөз кылат. Анын айтымында, ал өмүрү үчүн күрөшүп жатканда, анын айланасындагы адамдар анын мүлкүн жана баалуу нерселерин бөлүшүп, менчиктеше башташкан.
Акырында Абдыкеримов өзүнүн жашоосу, бизнесиндеги ийгиликке жетүү жолу, холдинг түзүү жана анын компаниясынын кыйрашынын себептери тууралуу кененирээк маалымат менен бөлүшүүнү пландап жатканын билдирди.
Эскерте кетсек, 2023-жылдын 8-сентябрында Шаршенбек Абдыкеримов сырттан камакка алынган. ГКНБнын маалыматы боюнча, анын менен байланышкан бир катар ири объектилер мамлекетке кайтарылган. Өткөн жылдын ноябрь айында, атайын кызматты жетектеген Камчыбек Ташиев Абдыкеримов алкоголь товарларына акциздик салык төлөбөгөнүн билдирген.
