Мындай аппараттарга муктаждык өткөн жылдын сентябрь айында өкмөт башчынын бул окуу жайына болгон визити учурунда айтылган. Машинкаларды сатып алуу үчүн резервдик фонддон 3 миллион сомдон ашык каражат бөлүнгөн. Жалпысынан 20 даана сатып алынган: алардын 10у Бишкекке жөнөтүлсө, калган 10у Ош шаарындагы көрүүсү начарлар үчүн интернатка берилет.
Perkins Brailler Classic машинкалары Брайль системасы боюнча жазууга үйрөнүү үчүн арналган. Бул аппараттар эффективдүү жана практикалык билим берүү процессин уюштурууга, студенттердин өз алдынча иштөө жөндөмдөрүн өнүктүрүүгө жана мугалимдердин ишин жеңилдетүүгө жардам берет.
Мындан тышкары, Касымалиев визити учурунда мекеменин ишмердүүлүгүнө байланыштуу башка актуалдуу маселелерди дагы талкуулады.
