2023-жылдын 28-январында Чырак айылында жашаган окуучулардын биринин атасы Джети-Огуз райондук милиция бөлүмүнө арыз жазып, уулу жана анын классташтары физрук Ж.К. тарабынан сабалганын билдирген.
Арыз катталган соң алдын ала тергөө иштери башталды.
Текшерүүнүн жыйынтыгы боюнча, ошол күнү саат 11:00 чамасында Чырак айылындагы орто мектепте, диний билим берүү сабагы учурунда, 1996-жылы туулган мугалим Ж.К. төрт сегизинчи класстагы окуучуну тактага чыгарып, тарбия максатында аларга сокку урган.
Зардап тарткан окуучулардын дене жаракаттарын аныктоо үчүн соттук-медициналык экспертиза дайындалды. Бирок, балдардын ата-энелери кийин мугалимге карата доо арыздарын жокко чыгарып, экспертизадан баш тартышып, жаңы арыз менен кайрылышты.
Мунун натыйжасында кылмыш иши козголгон жок. Бирок, Ж.К. «Сабоо» жөнүндөгү 56-беренеге ылайык жоопкерчиликке тартылды.
Бул берене боюнча «сабоо же башка зомбулук аракеттери, физикалык ооруну жараткан, эгерде алар кылмыштын квалификациялоочу белгилерин камтыбаса, 40 саатка чейин мажбурлап иштөө же үчтөн жети күнгө чейин камакка алуу менен жазага тартылат» деп белгиленген.
