Аталган мекеменин башкы дарыгери милдетин аткаруучу Роза Абильдаева жаңы жабдуулар хирургия, аялдар консультациясы, операция блогу, ультра үндүк диагностика бөлүмү жана төрөт бөлүмүнө өткөрүлүп берилгенин тактады.
«Эң маанилүү сатып алуулардын бири лапароскопиялык аппарат болуп саналат. Лапароскопиялык ыкманы колдонуу хирургиялык кийлигишүүлөрдү азыраак инвазивдүү кылып, минималдуу кесүүлөр менен жүргүзүүгө мүмкүндүк берет, бул болсо бейтаптардын тез калыбына келүүсүнө жана операциялардын коопсуздугун жогорулатууга жардам берет», — деди Роза Абильдаева.
Мындан тышкары, жабдууларды жаңылоо алкагында, борбордун карамагындагы беш үй-бүлөлүк врачтар тобунун медсестралары жана фельдшерлери электрондук чемодандар алышты. Бул медициналык топтомдор алыскы райондордун тургундарына ыкчам жана сапаттуу жардам көрсөтүүгө жардам берет», — деп кошумчалады ал.
Аманкан Жакишов атындагы жалпы врачтык практика борбору 1988-жылы курулуп, ачылган. Оорукананын 70 орундук жайы бар жана ал алты бөлүмдү камтып, райондун 27 миңден ашык тургуну үчүн кызмат көрсөтөт.
