Катуу үй-бүлөлүк калдыктар полигоны 1974-жылы эксплуатацияга берилген жана ушул жылдар бою үзгүлтүксүз иштеп келген. Анын аймагында болжол менен 20 миллион тонна таштанды жыйналган.
Мамлекет башчысы Бишкек шаарында көп жылдар бою катуу үй-бүлөлүк калдыктарды башкарууда олуттуу көйгөй бар экенин белгиледи. Күн сайын 1,5 миң тонна таштанды чыгарылып, бул борбордун экологиялык абалына терс таасир эткен.
Проекттин алкагында 95 миллион доллар инвестиция тартылган. Заводго 12 гектар жер бөлүнгөн, ал эми бардык каржылоо толугу менен инвестор тарабынан камсыздалган.
Президент ошондой эле, бул долбоордун алкагында мурда 22 миллион евро тартылганын, бирок алардын 16 миллиону белгиленген максатта пайдаланылбай, заводдун курулушунда кечиктирүүлөргө алып келгенин белгиледи.
Банктын эсептеринде 6 миллион евро калган, ал эми Бишкек мэриясы азыр 16 миллион евронун калган суммасын төлөп жатат.
«Заводдун курулушу бир жарым жылда аяктады, ал эми долбоорго эки жылдык мөөнөт каралган. Долбоорду ишке ашыруу боюнча концессия 35 жылды түзөт, анын аяктоосунан кийин завод мамлекеттик менчикке өтөт. Завод жылына 365 миң тонна калдыктарды кайра иштетүүгө мүмкүнчүлүк берет жана 30 МВт кубаттуулуктагы конденсациялык турбогенератордук электр станциясы курулат», - деди президент.
Алгачкы этапта завод күнүнө 1000 тонна калдыктарды кайра иштетет, андан кийин өндүрүштүк кубаттуулук акырындык менен жогорулатылат.
«Эгер долбоор ийгиликтүү ишке ашырылса, таштандыларды жок кылуу аркылуу электр энергиясын өндүрүүчү окшош заводдор Ош, Балыкчы жана Каракол шаарларында да курулат», - деп кошумчалады президент.
