Жыйында Бактыбек Кудайбергенов жыйналган маалыматты Улуттук статистика комитетинин борбордук серверине өткөрүү корголгон байланыш каналдары аркылуу жүргүзүлөрүн тактады, бул маалыматтарды иштеп чыгууда конфиденциалдуулукту жана ыкчамдуулукту камсыздайт.
Ошондой эле жыйында алдын ала чоң иштер жүргүзүлгөнү белгиленди:
1. Каттоо формалары жана негизги көрсөткүчтөр профильдик ведомстволор жана БУУнун Азык-түлүк жана айыл чарба уюму (ФАО) менен макулдашылган.
2. 4 каттоо формасы, персонал үчүн нускамалар жана деталдуу календардык план иштелип чыккан жана бекитилген.
3. 2024-жылы пилоттук каттоо өткөрүлүп, программалык камсыздоону жана методологияны жакшыртууга мүмкүнчүлүк берди.
4. 2025–2026-жылдары персоналды көп деңгээлдүү даярдоо (бетме-бет жана онлайн) жүзөгө ашырылат. Биринчи этапта 200дөн ашык адистин квалификациясы жогорулатылды.
Бардык процесстерди координациялоо үчүн 2025-жылдын декабрь айында ведомстволор аралык жумушчу топ түзүлгөн. Жалпысынан каттоого 6 791 убактылуу кызматкер тартылат, алардын ичинен:
— Регистраторлор – 1 179;
— Каттоочулар – 4 494;
— Нускамаларды текшерүүчү инструкторлор – 898;
— Координаторлор – 220.
Бекитилген графикке ылайык, координаторлор 2026-жылдын февраль айында ишин башташат, ал эми негизги кызматкерлер (инструкторлор жана каттоочулар) март-апрель айларында ишке чыгышат.
«Айыл чарба каттоосу – өлкөнүн азык-түлүк коопсуздугун камсыздоо боюнча объективдүү стратегия түзүү үчүн маанилүү инструмент. Бизге фермерлерди колдоо боюнча мамлекеттик программаларды эффективдүү пландаштыруу үчүн республикадагы агрардык потенциал жөнүндө максималдуу так маалымат алуу керек», — деп белгилешти Республика комиссиясынын мүчөлөрү.
Акырында Бакыт Торобаев мамлекеттик бийлик органдары жана жергиликтүү өз алдынча башкаруу органдары каттоону өткөрүүдө уюштуруу, логистика жана колдоо үчүн жоопкерчилик тартарын белгиледи.
Эскерте кетсек, Министрлер Кабинетинин чечимине ылайык, каттоо 2026-жылдын 20-мартынан 10-апрелине чейин өтөт.
