Өкмөттүн маалымат кызматынан алынган маалыматка ылайык, өкмөт башчысынын сентябрь айында өткөн бул билим берүү мекемесиндеги визити учурунда Брайль шрифтин үйрөнүү үчүн жаңы жазуучу машинкаларга муктаждык айтылган.
Өкмөт башчысынын резервдик фондунан 20 машинка сатып алуу үчүн 3 миллион сомдон ашык каражат бөлүндү. Алардын ону Бишкектеги интернатка өткөрүлүп берилди, ал эми калган 10 машинка Ош шаарындагы көрүү мүмкүнчүлүгү чектелген жана соо көздүү балдар үчүн атайын жалпы билим берүү интернаттык мектебине жөнөтүлөт.
Өкмөттүн билдирүүсүнө ылайык, бул машинкалар билим берүү процессинде маанилүү роль ойнойт. Алар Брайль шрифтин жазууну системалуу жана практикалык жактан үйрөнүүгө шарт түзүп, окуучулардын өз алдынча иштөө, майда моторика жана концентрация көндүмдөрүн өнүктүрүүгө, ошондой эле мугалимдердин ишин жеңилдетүүгө жана билим берүүнүн сапатын жакшыртууга жардам берет. Бул коррекциялык, билим берүү жана социалдык ишмердүүлүктү бирдиктүү педагогикалык система катары ишке ашырууга мүмкүнчүлүк берет.
Визит учурунда мекеменин иши менен байланышкан маселелер да талкууланды.
