Токторбаев мектептин ашканасында тамак-аштарды текшерип жатып, нан жана кызматкерлердин иши боюнча шок болгон. «Бул уят! Мына бул таш сыяктуу нанга караңыз. Муну үйгө алып барып, баланызга бериңиз — ал эки кесимин да жебейт. Чындап эле мындай самсаны бересиздерби? Муну мугалимдерге сунуштап көрүңүз — алар да баш тартышат. Мектепте мындай тамакты кантип даярдайсыздар?» — деп өзүнүн күмөн саноолорун билдирди.
Өзүнүн визити учурунда мэр тамак-аш даярдоо процессин, азык-түлүктүн сапатын жана санитардык нормалардын сакталуусун толук текшерүүнү талап кылды. Ал мектепте 1100дөн ашык бала билим алып жатканын белгилеп, тамактануу жаатындагы кандайдыр бир мыйзам бузууларды кабыл алууга болбой турганын айтты.
Мындан тышкары, ал мектептин аймагында жайгашкан коммерциялык объект боюнча маалыматтарды тактоону тапшырды. «Мектеп — бул социалдык объект. Анын аймагында кандайдыр бир курулуш мыйзамдуу жана макулдашылган болушу керек. Документтерди текшерип, толук пакетти бериңиздер», — деп кошумчалады ал.
Женишбек Токторбаев ошондой эле жергиликтүү бийлик билим берүү мекемелеринин аймактарын көзөмөлдөөнү күчөтүп, жерлерди басып алуу жана мыйзамсыз курулуштарды алдын алуу үчүн чараларды көрүп жатканын эске салды.
Рейддин жыйынтыгы боюнча мэрия тиешелүү кызматтарга ашкананы, жабдуулардын абалын жана азык-түлүктөрдү сактоо шарттарын кайрадан текшерүүнү, ошондой эле коммерциялык курулуштун мыйзамдуулугу боюнча отчетту сунуштоону тапшырды.
Мэрия коомчулукту кабыл алынган чаралар тууралуу кабардар кылууга убада берди.
