Бишкекте милиция кызматкерлери хулигандыкка шектүүнү кармады, деп билдирет Ленин районунун Ички иштер башкармалыгынын басма сөз кызматы.
Милициянын маалыматына ылайык, 2026-жылдын 17-январында, таңкы саат 7:05 чамасында, Ленин РУВДнын кезектеги бөлүмүнө бир ооруканадан А.К. аттуу 1993-жылы туулган жаран бычактан жаракат алып, ооруканага жаткырылганы тууралуу билдирүү келип түшкөн. Окуя болгон жерге оперативдүү-тергөө тобу жөнөтүлгөн.
Текшерүү учурунда эркектин сол жамбашында кесилген жаракат алгандыгы аныкталган.
Тергөө учурунда окуя Сельсовет көчөсүндөгү кафенин жанында болгондугу белгилүү болду. А.К. аттуу жаран белгисиз эркектин өз жубайына карата агрессивдүү жүрүм-турумун күбө болуп, кийлигишүүгө аракет кылган. Бул аракетине жооп катары кол салуучу анын менен чыр-чатакка кирип, жамбашына эки жолу бычак менен сокку урган, андан кийин кылмыш болгон жерден качып кеткен.
Бул окуя боюнча Кыргыз Республикасынын Кылмыш кодексинин 280-беренесинин 2-бөлүгүнүн 3-пункту (хулигандык) боюнча кылмыш иши козголгон. Зарыл экспертизалар дайындалган.
Ысык издер боюнча шектүү — 2001-жылы туулган А.А. аттуу жаран аныкталып, кармалган. Ал Тергөө кызматына жеткирилген жана убактылуу кармоо жайына жайгаштырылган.
Учурда алдын ала тергөө улантылууда.
