Мыйзам долбоорунун негизги сунуштарынын арасында кредиттик маалыматтарды сактоо мөөнөтүн кыскартуу каралган:
- позитивдүү маалымат — жети жылдан беш жылга;
- негативдүү маалымат — беш жылдан үч жылга.
Мындан тышкары, жаңы демилге боюнча 10 миң сомдон аз суммадагы кредиттер боюнча негативдүү маалымат бир жыл гана сакталат.
Министрликте бул мыйзам долбоорунун кабыл алынышы кредиттик кара тизмеге түшкөн карыз алуучулар үчүн шарттарды жакшыртып, жеке адамдар жана ишкерлер үчүн кредиттердин жеткиликтүүлүгүн жогорулатат деп эсептешет.
Депутат Марлен Маматалиев негативдүү маалымат бир жыл сакталчу кредиттик келишимдер боюнча лимитти 100 миң сомго чейин жогорулатуу сунушун киргизди. Ал эми анын кесиптеши Дастанбек Джумабеков позитивдүү кредиттик тарыхты сактоо мөөнөтүн узартуу керектигин айтып, банктарга жоопкерчиликтүү карыз алуучуларды жакшыраак көрүүгө мүмкүнчүлүк берерин белгиледи.
Талкуунун жыйынтыгында эл өкүлдөрү мыйзам долбоорунун концепциясын биринчи окууда жактырды.
