24-январга карата курулуш аянтчаларында төмөнкү даректер боюнча мыйзам бузуулар аныкталды: Севастопольская көчөсү, 8; Славянская көчөсү, 6/1; Фурманова көчөсү, 13.
Маалыматка ылайык, 14 кабаттуу турак жай комплексин куруу учурунда техникалык коопсуздук боюнча нормалар жана талаптар сакталган эмес. Ошондой эле иштердин жүрүшүндө курулуш стандарттары боюнча көптөгөн мыйзам бузуулар катталган.
«Объекттин ичинде подрядчик офис жайларын жана жарандарды кабыл алуу бөлмөсүн уюштурган. Бул объект өндүрүштүк коопсуздуктун жогорулаган деңгээлине тиешелүү болгондуктан, мындай аракеттер мыйзамды бузуу болуп саналат», - деп белгилешти Минстройдо.
Текшерүүнүн жыйынтыгында ОсОО «Зам Зам билдинг» компаниясына административдик айыппул дайындалды, ал эми компаниянын лицензиясын убактылуу токтотуу маселеси комиссиянын жыйынында талкууланды.
23-январь 2026-жылдагы комиссиянын чечими менен «Зам Зам билдинг» курулуш компаниясынын лицензиясы 90 күнгө токтотулду.
Маалымат:
Адилет министрлигинин маалыматына ылайык, ОсОО «Зам Зам билдинг» компаниясы 2022-жылы катталган. Абдукарим уулу Канатбек компаниянын жетекчиси болуп дайындалган, ал эми негиздөөчүлөрү Парпиев Дурусбек Усупбекович жана Абдукарим уулу Канатбек.
Көп кабаттуу ЖК Asia City, Севастопольская көчөсү, 8
