Бул долбоорду ишке ашыруу алкагында 187 500 000 сауд риялын тартуу пландалууда, бул болжол менен 50 000 000 АКШ долларына барабар. Кредиттин мөөнөтү — 25 жыл, анын ичинен биринчи 5 жыл жеңилдетилген, жылдык пайыздык ставкасы 1,5%. Каржылоо Бишкек шаарында беш жаңы мектеп жана жети кошумча окуу корпусун курууга, ошондой эле Чүй облусунда эки жаңы мектеп курууга багытталат, ар бир мектеп 150-1000 окуучуга ылайыкташтырылат. Долбоор 2026-жылы башталып, 2029-жылы, куруу үчүн эки жыл жана кепилдик кызматы үчүн бир жылды камтып, аяктайт.
Мындан тышкары, депутаттар 2025-жылдын 23-сентябрында Бишкекте кол коюлган «Суу менен камсыздоо жана санитарияга жалпы жеткиликтүүлүк (1-фаза)» программасы боюнча ОПЕКтин Эл аралык өнүктүрүү фонду менен келишимди ратификациялоо боюнча мыйзам долбоорун карашты. Бул мыйзам долбоору биринчи окууда кабыл алынды.
«Суу менен камсыздоо жана санитарияга жалпы жеткиликтүүлүк (1-фаза)» программасы Ош, Чүй жана Ысык-Көл облустарындагы 126 айылда коопсуз ичүүчү суу жана санитарияга жеткиликтүүлүктү жакшыртууга багытталган, бул 425 000ден ашык адамды таза суу менен камсыздоого мүмкүндүк берет.
Мыйзам долбоорун талкуулоодо депутаттар, анын ичинде Камила Талиева, Жаныбек Абиров, Азамат Исираилов, Болот Сагынаев, Исманали Жороев, Махабат Мавлянова, Токтобубу Ашымбаева, Эдита Тайгараева жана Гулшаркан Култаева, программанын деталдарын тактап, коопсуз ичүүчү суу жана санитарияга жеткиликтүүлүктү жакшыртуу маселелерине көңүл бурушту.
