Кыргызстанда Нипах вирусунун жайылышын алдын алуу боюнча комплекстүү иш-чаралар башталды. Бул маалыматты Саламаттык сактоо министри Каныбек Досмамбетов Жогорку Кеңештин жыйынында билдирди.
Министр республика коңшу өлкөлөр, мисалы, Казакстан жана Өзбекстан менен активдүү кызматташып, маалымат алмашып, жооп берүү протоколдорун изилдеп жатканын белгиледи.
«Приоритет – Индиядан кайтып келген студенттерди медициналык текшерүү. Президенттик администрация коопсуздукту жогорулатуу үчүн каражат бөлдү. Эл аралык аэропорттордо заманбап автоматтык термографиялык аппараттар орнотулууда. Учурда мындай жабдык «Манас» аэропортунда иштеп жатат, бирок жакынкы убакта Ош, Тамчы, Каракол жана башка эл аралык аба портторунда орнотуу пландалууда», — деп кошумчалады Досмамбетов.
Ал ошондой эле учурдагы кырдаал толук контролдо экенин жана олуттуу тынчсызданууга негиз жок экенин билдирди.
