Россияга болгон жумушчу сапарында саламаттыкты сактоо министри Каныбек Досмамбетов кыргызстандык медициналык кызматкерлер менен жолугушуу өткөрдү.
Министрликтин басма сөз кызматынын маалыматына ылайык, жолугушуу Россиядагы Кыргызстан элчилигинде өтүп, Москвада иштеген 60тан ашык дарыгерди чогултту.
Медициналык кадрларды мекенине кайтаруу жана Кыргызстандагы саламаттыкты сактоо системасында алардын кесиптик өсүшү үчүн шарттарды түзүү темалары талкууланды.
Жолугушуу учурунда министр тармакты реформалоо, медициналык мекемелерди модернизациялоо, айлык акыны жогорулатуу, инфраструктураны жакшыртуу жана медициналык кызматкерлердин эмгек шарттарын түзүү пландары жөнүндө айтып берди. Социалдык колдоо, карьералык өсүш жана жаш адистер үчүн ыңгайлуу шарттарды түзүүгө өзгөчө көңүл бурулду.
Медиктер өлкө сыртындагы иш тажрыйбалары менен бөлүшүп, Кыргызстандагы жумушка орношуу, адаптация жана карьералык мүмкүнчүлүктөр боюнча сунуштарын жана суроолорун билдиришти.
Жолугушуунун натыйжасында бир нече жаш адис мекенине кайтып, саламаттыкты сактоо тармагында кесиптик ишмердүүлүгүн улантууну каалаарын билдиришти.
«Саламаттыкты сактоо системасы жогорку квалификациялуу, максатка умтулган жана ишине берилген адистерге муктаж. Мамлекет биздин дарыгерлер жана медициналык кызматкерлердин кайтып, калктын ден соолугун чыңдоого салым кошуусун каалайт. Министрлик ар тараптуу колдоо көрсөтүүгө жана жашоо менен иштөө үчүн ылайыктуу шарттарды түзүүгө даяр», — деди Каныбек Досмамбетов.
```
