Министрликтин маалымат борборунан билдиришкендей, энелердин жана балдардын ден соолугун коргоо, баштапкы медициналык-санитардык жардамды өнүктүрүү, иммунизация жана саламаттык сактоо системасына санариптик технологияларды киргизүү сыяктуу негизги багыттар талкууланды.
Сүрөт МЗ КР
Дамир Осмонов: «Биргелешкен иш-аракеттер маанилүү жетишкендиктерге жетүүгө мүмкүнчүлүк берди. Соңку 10 жылда Кыргызстанда балдардын өлүмү 73 пайызга төмөндөгөн. 2023-жылы ЮНИСЕФтин колдоосу менен жүргүзүлгөн комплексдүү изилдөөнүн жыйынтыктарына ылайык, акыркы беш жылда беш жашка чейинки балдардын өлүмү 1000 тирүү төрөлгөндөн 20дан 16,5ке төмөндөгөн».
Министр ЮНИСЕФтин баштапкы медициналык жардамды өнүктүрүү, боюнда бар аялдар, жаңы төрөлгөндөр жана өспүрүмдөр үчүн кызмат көрсөтүү, ошондой эле заманбап медициналык кызмат көрсөтүү стандарттарын түзүү боюнча колдоосунун маанилүүлүгүн белгиледи.
Дары-дармек менен камсыздоо маселесине өзгөчө көңүл бурулду. Осмонов министрлик ЮНИСЕФ аркылуу дары сатып алууга киришкенин жана бул кызматташтыкты кеңейтүүнү пландап жатканын билдирди.
Жолугушуунун жүрүшүндө иммунизация системасын күчөтүү боюнча маселелер, вакцинацияны кеңейтүү жана улуттук вакциналарды башкаруу системасын өнүктүрүү боюнча биргелешкен аракеттер талкууланды.
Мындан тышкары, тараптар Telemed.kg платформасы аркылуу телемедицинаны өнүктүрүүгө көңүл бурушту, бул алыстагы райондордун тургундарына адистерден консультация алууга мүмкүнчүлүк берет.
Баштапкы медициналык жардамды санариптештирүү алкагында ЮНИСЕФ 247 планшетти өткөрүп берди, алар медициналык кызматкерлер тарабынан алыстан консультация алуу үчүн пайдаланылат, бул медициналык кызмат көрсөтүүнүн жеткиликтүүлүгүн жогорулатат.
Дамир Осмоновдун кошумчалаганындай, ЮНИСЕФ менен мындан аркы кызматташтык саламаттык сактоо системасын күчөтүүгө жана Кыргызстандагы үй-бүлөлөрдүн жана балдардын ден соолугун жакшыртууга жардам берет.
