Бишкекте «Жашыл ишкер» аттуу тегерек стол өтүп, анда пластик жана алюминий калдыктарын чогултуу үчүн бонус системасы менен фандоматтарды орнотуу талкууланды. Иш-чаранын жүрүшүндө бизнес өкүлдөрү жана мамлекеттик структуралар пластик менен булганууга каршы биргелешип күрөшүү боюнча аракеттерин талкуулашты.
Табигый ресурстар министрлигинин маалыматы боюнча, фандоматтарды орнотуу үчүн приоритеттүү жерлер катары соода тармактары, базарлар, күйүүчү май станциялары, тамактануу жайлары жана билим берүү мекемелери белгиленди. Бул жарандардын калдыктарды бөлүп чогултууга болгон адаттарын калыптандырууга жардам бериши керек.
Мындан тышкары, катышуучулардын көңүлү Кыргыз Республикасынын «Полимер пленкадан жана пластик буюмдардан жасалган пакеттердин айлануусун чектөө жөнүндө» мыйзамын ишке ашырууга даярдыкка бурулду.
«Пластик менен булгануу көйгөйү глобалдык, бирок инновациялык чечимдер жана биздин кызматташтыктын жардамы менен Кыргызстан Борбордук Азияда экологиялык инициативалар боюнча лидерлик орунду ээлей алат», - деди вице-министр Жеңиш Сейдалиев.
Министрлик ошондой эле «Жашыл ишкер» мамлекеттик брендин түзүүнү жана бизнесмендер арасында экологиялык жоопкерчиликти жогорулатууну пландаштырууда, бул туруктуу өнүгүү жана айланма экономика принциптерин ишке ашырып жаткан компанияларды бөлүп көрсөтүүгө мүмкүндүк берет.
Жыйынды жыйынтыктап, катышуучулар биргелешкен пилоттук долбоорлорду ишке ашырууга макулдашышып, Кыргызстанда пластик изин азайтуу жана нөлдүк булгануу моделине өтүү үчүн узак мөөнөттүү кызматташууга даярдыктарын билдиришти.
Талкууга биринчи вице-министр Жеңиш Сейдалиев жана «Шоро» ЖЧК, «Кока-Кола Бишкек Боттлерс» ЖЧК, «Азия Ритейл» ЖЧК, «Умай Групп» ЖЧК, «Партнёр Нефть» ЖЧК жана полимерлерди кайра иштетүү боюнча алдыңкы ишканалардын өкүлдөрү катышты.
