Расмий визиттин алкагында Түркияга, Жогорку Кеңештин Төрагасы Нурланбек Тургунбек уулу Түркия Республикасынын президенти Реджеп Тайип Эрдоган менен жолугушту. Бул тууралуу парламенттин маалымат кызматы билдирет.
Тараптар эки тараптуу мамилелерди бекемдөө мүмкүнчүлүктөрүн жана Кыргызстан менен Түркиянын ортосундагы кызматташтыкты тереңдетүү боюнча негизги багыттарды талкуулашты. Тургунбек уулу Кыргызстан президенти Садыр Жапаровдун саламын өткөрүп, эки өлкөнүн ортосундагы өнөктөштүктү бекемдөө үчүн жогорку деңгээлде тыгыз өз ара аракеттенүүнүн маанилүүлүгүн белгиледи.
Ал ошондой эле, Эрдогандын 2024-жылы Кыргызстанга жасай турган мамлекеттик визити стратегиялык кызматташтыкта жаңы баракча ачып, символикалык окуя болоорун айтты. Төрага Кыргызстандын бардык багыттар боюнча өз ара аракеттенүүнү активдүү өнүктүрүүгө кызыкдар экенин билдирип, парламенттин жетишилген макулдашууларды ишке ашырууну колдоого даяр экенин растады.
Түрк тилдүү өлкөлөр арасындагы кызматташууга чоң көңүл бөлүндү. Тургунбек уулу Түрк мамлекеттер уюму жана ТүркПА алкагында биргелешкен иш-аракеттер жөнүндө эскертип, быйыл Бишкекте пландалган ТүркПАнын отуруму тууралуу маалымат берди.
Ошондой эле Төрага бул анын дайындалгандан кийинки биринчи расмий визити экенин, бул кыргыз жана түрк элдеринин жакындыгын символдойт деп белгиледи. Ал соода-экономикалык мамилелерди өнүктүрүү боюнча идеяларды сунуштап, Түркия президентине биргелешкен долбоорлорго саясий колдоо көрсөтүүнү өтүндү.
Эрдоган болсо, бул визит эки тараптуу кызматташтыкты өнүктүрүү үчүн жаңы түрткү болооруна ишенимин билдирди, Кыргызстан менен бир туугандык жана стратегиялык байланыштардын маанилүүлүгүн белгиледи.
Сүрөт www
