Орун басар министрдин айтымында, келишим 367 товардык позиция боюнча өз ара бажы төлөмдөрүн төмөндөтүүнү камтыйт. Бул документ убактылуу жана үч жылга эсептелген, тараптар бардык шарттарды сактаган учурда дагы бир үч жылдык мөөнөткө узартуу мүмкүнчүлүгү бар.
Талкуу учурунда депутаттар жеңилдетилген шарттарга кирген товарлар тууралуу кызыгышты, атап айтканда, эт жана фасоль боюнча суроолор болду. Чоро Сейитов эт азыктары жеңилдетилген товарлардын тизмесине кирерин тастыктады. Ал ошондой эле Монголиядан келген эттин баасы арзан болорун белгилеп, келишимдин ишке ашышы Кыргызстан рыногуна оң таасир этет деген үмүтүн билдирди.
Мындан тышкары, орун басар министр бекитилген товарлар тизмесине жашылча, жемиш, фасоль жана ар кандай жабдуулар киргенин тактады.
Талкуунун жыйынтыгында депутаттар мыйзам долбоорун биринчи окууда кабыл алышты.
