Жыйында региондун экономикалык өсүшүнүн жыйынтыктары сунушталды. Жыл ичинде өнөр жай продукциясынын көлөмү 16 миллиард 800 миллион сомду түзгөнү, бул 2024-жылга салыштырганда 9 миллиард 964 миллион сомго көп экендиги маалымдалды.
Өнөр жай өндүрүшүндөгү өсүүнүн негизги фактору металлургия тармагы болду. Мисалы, 2024-жылы металл өндүрүшүнүн көлөмү 360 миллион сом болсо, 2025-жылы бул көрсөткүч 23 эсе көбөйүп, 8 миллиард 336 миллион сомго жетти.
Мындан тышкары, региондогу көмүр казуу ишканалары 2 миллион 523 миң 769 тонна көмүр өндүрүштү, ал эми Ат-Башы ГЭСи 189,1 миллион кВт·ч электр энергиясын өндүрдү. Ошондой эле Солтон-Сары кенинин Бучук участогунан 876 кг алтын казылды.
Солтон-Сары кенинде үч участок бар: Бучук, Ак-Таш жана Алтын-Тор. Бул кендин жалпы болжолдуу алтын запастары 20-22 тонна деп бааланууда.
Мындан тышкары, мамлекеттик колдоонун аркасында Нарын облусуна 16 миллиард сомдон ашык каражат бөлүнүп, бул өнөр жай, энергетика, курулуш, жол инфраструктурасы, ошондой эле өндүрүш жана туризм тармактарында маанилүү долбоорлордун ишке ашырылышына көмөктөштү.
2025-жылдын мартында табигый ресурстар министри Медер Машиев Бишкектеги брифингде маалымдагандай, кытайлык Zhong Ji Mining компаниясы 2025-жылы 3,4 тонна алтын казууну пландап жатат. Бул компаниянын негиздөөчүсү кытай мамлекеттик корпорациясы China Gold.
