«Саякат» туристтик комплексин модернизациялоого 5 миллион доллар инвестиция тартылган, ал эми «Достук» мейманкана комплексин толук жаңылоого 15 миллион доллардан 25 миллион долларга чейин каражат бөлүнгөн.
Бул объектилерди Дирекцияга өткөрүп берүүдөн мурун, алар көп жылдар бою маанилүү оңдоп-түзөөлөргө кабылган эмес жана олуттуу модернизациялоону талап кылган.
«Имараттардын техникалык абалы убакыттын өтүшү менен кыйла начарлады. Инженердик тармактар эскирип, айрым элементтер авариялык абалга келип калды. Атап айтканда, электр системасы жана жабдуулары заманбап коопсуздук стандарттарына жооп бербейт. Электр зымдарынын эскилиги жана анын жетишсиз кубаттуулугу өрт чыгуу коркунучун жогорулатууда, меймандар менен кызматкерлердин коопсуздугуна коркунуч туудурууда. Мындан тышкары, канализация жана суу тармактары да көп жылдар бою жаңыланган эмес», - деп айтылат билдирүүдө.
Капиталдык ремонттун алкагында, кол коюлган инвестициялык келишимдерге ылайык, электр системаларын толук модернизациялоо жана коопсуз, энергияны үнөмдөгөн жабдууларды орнотуу иштери жүргүзүлүүдө. Ошондой эле, заманбап технологияларды колдонуу менен суу менен камсыздоо жана канализация системалары жаңыланууда. Мындан тышкары, имараттардын чатырын, фасаддарын жана ички жайларын капиталдык ремонттон өткөрүү, жылуулук системаларын калыбына келтирүү иштери жүргүзүлүүдө.
Инвесторлор тарабынан иштердин эрте башталышы көптөгөн коркунучтарды болтурбоо менен бирге, мейманкана комплекстерин эл аралык стандарттарга алып келүүгө мүмкүндүк берет. Жакын арада «Саякат» туристтик комплекси жана «Достук» мейманканасы шаарды кооздоп турган ири объектилердин катарында өзүнө ылайыктуу орунду ээлей алат.
«Достук» мейманканасы Дирекциянын башкаруусуна өткөрүлгөндөн кийин, мурда жеке акционерге таандык болгон 35,59% акция мамлекетке кайтарылды.
Эскерте кетсек, мейманкана комплекси «Достук» реновация учурунда иштебейт. Бирок, инвестициялык келишимди жана узак мөөнөттүү ижара келишимин кол койгон инвестор, реновацияга олуттуу инвестицияларды жумшоо менен бирге, жылына 40 млн 800 миң сом ижара төлөмдөрүн төлөөгө милдеттенмелерин алган. 2027-жылдын төртүнчү кварталынан баштап ижара акысы эки эсе көбөйүп, жылына 80 млн 580 миң сомду түзөт, ал эми 2029-жылдын төртүнчү кварталынан 2049-жылга чейин ижара акысы жылына 100 млн 900 миң сомго чейин өсөт. Бул келишим «Достук» мейманкана комплексинин тарыхындагы эң пайдалуу жана экономикалык жактан негизделген долбоор болуп калды.
