Ал мындай суроо берди: "Бул кырдаалдан ким пайда көрүп жатат? Миллиарддаган салык бюджетке түшпөй жатат. Пайдаланууга берилгенден кийин компаниялар салык төлөшү керек, бирок бул болбой жатат. Министрликтин кызматкерлери пайдаланууга берүүгө эмне үчүн жардам бербейт?"
Жооп катары курулуш министри Нурдан Орунтаев бул айыптоолорду четке какты.
“Биринчи кезекте, мындай кырдаалга эч ким кызыкдар эмес. 2022-жылга чейин республикада адамдар формалдуу пайдаланууга берилбеген 200дөн ашык объектте жашап келишкен. Учурда бул маселени чечүү үчүн атайын комиссия түзүлдү. Өткөн жылы 150 объект пайдаланууга берилди, алардын көпчүлүгүндө керектүү документтер жок болчу, ал эми кээ бир компаниялардын ээлери качып кетишкен. Бир жылдын ичинде 150 объект боюнча маселени чечүүгө жетиштик. Азыр дагы 50 объект боюнча иштер уланууда”, - деди министр.
Ошондой эле өкмөттүн биринчи орун басары Данияр Амангельдиев акыркы убакта пайдаланууга берилген объекттердин саны көбөйгөнүн белгиледи. Анын айтымында, 2025-жылы пайдаланууга берилген объекттердин көлөмү 2024-жылга салыштырмалуу 57% га жогорулайт.
