Сайкал 2007-жылы Узген районунда төрөлгөн. Ал 9-класска чейин Мырза-Аке айылында окуп, андан кийин 10-11-класстарды Бишкекте аяктаган. Азыр болсо Kyungwoon университетинде корей тилин үйрөнүүдө.
Сайкалдын Кореяга болгон кызыгуусу мектеп жашында пайда болгон. «Көпчүлүк кыздардай, 10-12 жашымда K-pop жана дорамаларга кызыгып, ошол кезде Кореяда окуу үчүн чечим кабыл алдым. 10-класстан баштап тилди чын дилимден үйрөнүп, өлкөнүн маданиятын изилдей баштадым. 11-классты аяктаган соң, билим алуу үчүн бул жакка көчүп келдим», - деп айтып берди ал.
Сайкал Кореядагы жашоосун жактырганын, бирок кээ бир кыйынчылыктарга да туш болгонун мойнуна алат. «Бул жакта мага абдан ыңгайлуу: тазалык, тынчтык, жана адамдардын көбү достук мамиледе, жардам берүүгө даяр. Албетте, наадир адамдар да кездешет — идеалдуу жерлер жок», - деп кошумчалады ал.
Кыз Кореянын Кыргызстанга караганда ыңгайлуулугу менен айырмаланарын белгиледи. «Бул жакта абдан ыңгайлуу. Мисалы, түн ичинде тамак жегим келсе, ар дайым 24 саат иштеген дүкөн табылат. Кыргызстанда дүкөндөрдүн көбү түнкү онго чейин жабылат. Мындан тышкары, коопсуздук деңгээли жогору: көчөдө эч ким тынчсыздандырбайт, бул кыздар үчүн өзгөчө жагымдуу», - дейт ал.
Кореядагы жашоонун эң таң калыштуу аспектилеринин бири Сайкал үчүн катуу таштанды сорттоо системасы болду. «Кыргызстанда көбүнчө баарын биригип ташташат. Ал эми бул жакта пластик, кагаз, металл жана айнекти бөлүп таштоо керек. Эгер эрежелерди сактабаса, катуу айып пул алууга болот, жана камералар аркылуу бузгучтарды тез эле табышат», - деп айтып берди ал.
Сайкал Кореяда болжол менен алты ай жашап жатат. Бул убакыт ичинде ал волонтердук долбоорлорго катышып, ар кандай шаарларды кыдырган. «Мен бул жакта алты аймын. Чоң жетишкендиктерим жок болсо да, бир нече эл аралык саммиттерге волонтер катары катыштым, корей тилин жакшырттым жана бир нече шаарды акысыз кыдырдым», - деп бөлүштү ал.
Сайкалдын айтымында, ал үй-бүлөсүнүн колдоосу аркылуу чоң кыйынчылыктардан кача алган. «Чоң көйгөйлөр болгон жок — жакындарым дайыма жардам беришти. Бирок ата-энемди, бир туугандарымды сагынам — бул оңой эмес. Бардыгы жакшы болот деп үмүттөнөм. Менин шаарымда көп кыргызстандыктар бар, биз кээде жолугуп турабыз, студенттер арасында жолугушуулар уюштурулат», - деп айтып берди ал.
Пландары тууралуу сүйлөгөндө, Сайкал Кыргызстанга кайтып келип, өлкөнүн өнүгүүсүнө салым кошууну каалаганын билдирди.
«Мен университетти аяктап, диплом алууну жана мекениме кайтып келүүнү көздөп жатам. Кыргызстанды өнүктүрүүгө салым кошуп, жакшы жумуш табууну жана Кореяда алган билимдеримди биздин билим берүү системасын жакшыртуу үчүн колдонгум келет», - деп белгиледи Сайкал Карыбекова.
