Иш-чарада катышуучуларга эмираттык «Өкмөттүк акселераторлор» программасын Кыргызстанда ишке ашыруу боюнча видеоролик көрсөтүлдү.
«Бүгүн биз Дүйнөлүк өкмөттөр саммитинде биздин экономикалык өсүш моделибиз тууралуу биринчи жолу сүйлөп жатабыз. Кыргызстандагы жетишкендиктерибиз жана «Кар көчкү» концепциясы менен бөлүшүү биз үчүн маанилүү», — деди Адылбек Касымалиев.
Ал экономикалык өсүш моделинин негизинде үч негизги багыт бар экенин белгиледи: өкмөттүк акселераторлор, натыйжалуу институттар жана инвестициялар. Бул демилге мамлекеттик башкаруу системасында маанилүү өзгөртүүлөрдү алып келди. Программа аркылуу Кыргызстан 100 күндүк реформаларды ишке ашырууда, бул актуалдуу маселелерди чечүүгө багытталган. Программанын иштөө мезгилинде 17 реформа ийгиликтүү ишке ашырылды.
«Акыркы төрт жылда Кыргызстандын экономикасынын орточо өсүү темпи 9-10% түздү. Эл аралык валюта фондуна ылайык, 2025-жылы өлкө реалдуу ИДП өсүү темптери боюнча дүйнөнүн үч лидери катарына кирет. Бюджет үч эсе, ал эми ИДП 2,5 эседен көпкө өстү. Чектелген ресурстар менен да өлкө тез жана натыйжалуу өнүгө аларын далилдедик. «Кар көчкү» модели өнүгүп келе жаткан көптөгөн өлкөлөр үчүн пайдалуу болушу мүмкүн деп ишенем», — деп кошумчалады ал.
