Кыргызстандын Улуттук коопсуздук мамлекеттик комитети (УКМК) Тогуз-Тороу районундагы жергиликтүү мектептерге жана бала бакчаларга коркунуч туудурган жаш интернет-террорист тууралуу маалыматты ачыктады. Бул 8-класстын окуучусу экени аныкталган.
УКМКнын маалыматы боюнча, Facebook социалдык тармагында «Казарман реклама» баракчасында Казарман айылындагы билим берүү мекемелеринде пландаштырылган террордук актылар тууралуу билдирүүлөр жайгаштырылган. Посттор жасалма аккаунттан жарыяланган.
УКМКнын расмий билдирүүсүндө: «Оперативдүү-издөө иш-чараларынын жүрүшүндө 8-класстын окуучусу B.К. аныкталды. Ал интернет-террористтердин таасиринде болуп, психологикалык басымдын астында аракет кылып, террордук акт жасоону көздөгөн» деп айтылат.
Учурда кармалган адамга карата тергөө иштери жүргүзүлүүдө жана УКМК Кыргызстандын мыйзамдарына ылайык чараларды көрүүдө.
Мындан тышкары, ведомстводо оор жана өтө оор кылмыштарды жасаган үчүн кылмыш жоопкерчилиги 14 жаштан башталат деп эскертишти. Террордук акт коркунучун билдирген үчүн беш жылдан он жылга чейин эркинен ажыратуу жазасы каралган.
