Досмамбетовдун айтымында, жаңы структурада кеминде он адисти жумушка алуу пландалууда. Бөлүмдүн негизги милдети медицинада санариптик технологияларды өнүктүрүү жана киргизүү болот.
Ал ошондой эле жакында санариптештирүү министри менен жумушчу жолугушуу өткөнүн, анын жүрүшүндө биргелешкен иштин жаңы багыттары аныкталганын белгиледи. Бул демилгелерди ишке ашыруу 2026-2027-жылдарда башталат деп күтүлүүдө.
Негизги милдеттердин бири телемедицина жана жумуш убактысын электрондук эсепке алуу системасын бирдиктүү платформага интеграциялоо болот. Саламаттык сактоо министри көптөгөн процесстер азырынча автоматташтырылбаганын, бул олуттуу көйгөйлөрдү жаратып жатканын белгиледи.
Досмамбетов онкологиялык кызматты мисал катары келтирип, анда онкологиялык оорулар боюнча бирдиктүү реестрдин жоктугун айтты. Бул оорулардын аныкталышы, стадиялары жана диагностикадан өтүүсү тууралуу толук маалымат алууну кыйындатат.
Министр санариптик реестрлерди жана эсепке алуу системаларын түзүү тармакты уюштурууга жана медициналык кызматтардын сапатын жакшыртууга жардам берет деп баса белгиледи.
