Бул аймак эл аралык финансылык борбор үчүн платформа болуп, глобалдык финансылык ресурстарды, ошондой эле финтех жана IT-жаңычылыктарды чогултат. Мындан тышкары, бул жерде эл аралык соода жана жүк агымдарын бириктире турган заманбап логистикалык хаб түзүлөт.
Маалыматка ылайык, 2023-жылдан 2035-жылга чейин заманбап офис имараттары, турак жай комплекс жана туристтик объекттерди этап-этабы менен куруу пландалууда, жалпы аянты 470 миң квадрат метрден ашат. Аймак үч зонага бөлүнөт: бизнес, логистика (учак майданга жакын) жана рекреациялык.
Бизнестин кызыкчылыктарын коргоо үчүн англис укугуна негизделген көз карандысыз эл аралык борбор түзүү пландалууда.
Жаңы аймактын резиденттери 49 жылга чейин салык жеңилдиктерин алышат. Ошондой эле капиталдын эркин кыймылы, ийкемдүү валюталык режим жана чет өлкөлүк инвесторлордун бизнеске 100 пайыздык катышуусу үчүн мүмкүнчүлүктөр каралган.
Аянты 100 гадан ашык болгон аймакта 2035-жылга чейин жыл сайын 90 миң туристти тартууга жөндөмдүү өнүккөн инфраструктура түзүү пландалууда.
«Кыргыз Республикасы инвесторлорду тосуп алат. Биз так эрежелерди, сапаттуу коштоону жана узак мөөнөттүү туруктуулукту сунуштайбыз. Сиздин ийгилигиңиз — жаңы жумуш орундарын, технологияларды жана экономикалык өсүүнү камсыз кылат. Биздин экономикабыз таң калыштуу ылдамдыкты көрсөтүүдө: 2025-жылы ИДПнын өсүшү 11,1% деңгээлинде болот, ал эми акыркы төрт жылда орточо реалдуу өсүш 10,2% түздү. «Тамчы» бул өнүгүүгө жаңы импульс берчү маанилүү фактор болот. «Тамчыга» кош келиңиздер», — деди Адылбек Касымалиев.
