Президентке караштуу Улуттук инвестиция агенттигинде япон бизнесмендери менен болгон жолугушуунун алкагында Кыргызстан менен Япониянын экономикалык кызматташтыгын өнүктүрүү жана инвестициялык өз ара аракеттенүүнүн келечеги боюнча маселелер талкууланды.
Агенттиктин маалыматына ылайык, сүйлөшүүлөрдүн жыйынтыгында эки тараптын да мындан аркы кызматташууга кызыгуусу тастыкталды, конкреттүү инвестициялык демилгелерди талкуулоону улантуу боюнча макулдашууга жетишилди.
Япон тарапка Кыргызстандагы инвестициялык климаттын жалпы көрүнүшү сунушталды, анын ичинде мамлекеттик колдоо чаралары, салыктык жана укуктук артыкчылыктар, ошондой эле чет элдик инвестицияларды коргоо боюнча кепилдиктер. Проекттерди ишке ашыруу механизмдери жана институттук колдоо инструменттери да түшүндүрүлдү.
Талкуунун жүрүшүндө энергетика, инфраструктура, өнөр жай, агроөнөр жай комплекси жана санариптик трансформация сыяктуу экономикасынын негизги тармактарына өзгөчө көңүл бурулду. Чет элдик инвесторлор үчүн бизнес чөйрөнү жакшыртууга жана ачык шарттарды түзүүгө багытталган реформалар тууралуу маалымат берилди.
Япониянын Эл аралык кызматташтык агенттигинин (JICA) эксперти Кыргызстандын жогорку инвестициялык потенциалын, анын пайдалуу географиялык жайгашуусун жана регионалдык рынокторго чыгуу мүмкүнчүлүктөрүн баса белгиледи.
