Конференцияда ал мазмундуу доклад менен чыкты.
Форум Тажикстандын Душанбе шаарындагы Улуттук китепканада өтүп, Тажикстан, Россия, Кыргызстан, Казакстан жана Өзбекстандан келген жетекчи илимпоздор, эксперттер, мамлекеттик органдардын өкүлдөрү жана финансылык тармактын адистерин чогултту.
Иш-чаранын алкагында ректор А. Мамасыдыков саламдашуу сөзүн сүйлөп, бүгүнкү күндө финансылык системанын цифралдык трансформациясы мамлекеттердин экономикалык туруктуулугун камсыздоонун негизги факторлорунун бири болуп жатканын белгиледи.
Анын айтымында, цифралдык технологиялар финансылык башкаруунун ачыктыгын, ылдамдыгын жана натыйжалуулугун жогорулатат, ошол эле учурда адамдык капиталга инвестицияларды талап кылат.
Сөзүндө ректор Борбордук Азия өлкөлөрү үчүн финансылык-цифралдык билимдин өнүгүшүнүн өзгөчө маанилүүлүгүн баса белгилеп, экономикалык өсүш жана бизнес-процесстердин ылдамдыгы ушул багытта кадрларды даярдоого түздөн-түз көз каранды экенин айтты.
Форумдун жүрүшүндө акча которууларды кеңейтүү, цифралдык чөйрөдөгү баалуу кагаздар рыногун өнүктүрүү, ислам финансылары, жашыл финансылар жана мамлекеттик финансыларды башкарууда цифралдык технологияларды колдонуу маселелери кеңири талкууланды.
Айрыкча, ислам финансылары ишкерликтин өнүгүшүнө жана чакан жана орто бизнеске колдоо көрсөтүүгө көмөктөшөрү, ал эми жашыл финансылар экологиялык жактан таза инвестициялык долбоорлорду илгерилетүүгө багытталгандыгы белгиленди. Ошондой эле, баалуу кагаздар рыногунун өнүгүшү регионалдык экономикалар үчүн жаңы мүмкүнчүлүктөрдү ачат деп баса белгиленди.
Форумдун жыйынтыгында эл аралык илимий-практикалык кызматташтыкты чыңдоо максатында Кыргыз-Узбек эл аралык университети Тажикстандын Каржы министрлигине караштуу илимий-изилдөө финансылык институту менен кызматташуу келишимин түздү.
Бул форум Кыргыз-Узбек эл аралык университетинин эл аралык байланыштарын чыңдоого жана финансылык жана цифралдык экономика тармагындагы академиялык жана практикалык кызматташтыкты өнүктүрүүгө маанилүү салым кошту.
