Билим берүү министрлигинин маалымат кызматы билдиргендей, өлкөнүн ар кайсы региондорунан 100дөн ашык информатика мугалимдери бул иш-чарага чогулушту. Ошондой эле министрликтин, Дүйнөлүк банктын, Кыргыз билим берүү академиясынын жана билим берүү жана маалымат технологиялары тармагындагы уюмдардын өкүлдөрү да катышты.
Билим берүү министринин орун басары Лира Самыкбаева форумду ачып жатып, мугалимдердин санариптик жөндөмдөрүн өнүктүрүү билим берүү системасын ийгиликтүү санариптештирүү үчүн маанилүү шарт экенин баса белгиледи. Ал көптөгөн өлкөлөрдө информатика сабагы традициялык ыкмадан санариптик платформаларды жана интерактивдүү ресурстарды активдүү пайдаланууга өтүп жатканын, бул предметтин мазмунун жаңыртып, окуучулар үчүн билим алууну практикалык жана жеткиликтүү кылып жатканын айтты.
Форумдун катышуучулары талкуулардын жүрүшүндө билим берүү процессин башкаруу үчүн санариптик платформаларды пайдаланууну караштырып, мектептерде алардын колдонулушун көбөйтүү боюнча идеяларын бөлүштү.
Министрликтин маалыматына ылайык, «Санариптик жөндөмдөрдү өнүктүрүү» долбоору Кыргызстанда мугалимдердин жана окуучулардын санариптик компетенцияларын жогорулатуу үчүн башталган. Пилоттук долбоорго «Келечектеги билим берүү» демилгесинин алкагында 1 200 мектептин 150ү катышты. Долбоордун алкагында санариптик жөндөмдөрдү баалоо үчүн инструменттер иштелип чыккан жана мугалимдердин квалификациясын жогорулатуу боюнча иш-чаралар уюштурулган.
Мындан тышкары, форумда «Тунгуч» аттуу биринчи онлайн-мектептин концепциясы сунушталды, билим берүү процессинде жасалма интеллектти колдонуу перспективалары жана улуттук билим берүү платформалары үчүн жаңы мүмкүнчүлүктөр талкууланды.
