26-январда Бишкекте энергетика министри Таалайбек Ибраев Дүйнөлүк банктын Борбордук Азия боюнча регионалдык директору Наджи Бенхассин менен энергетикалык долбоорлордун маанилүү аспекттерин талкуулады.
Министрликтин маалыматына ылайык, талкуу учурдагы абал жана энергетика тармагындагы биргелешкен демилгелердин келечектеги мүмкүнчүлүктөрүн камтыды.
Жыйындын жүрүшүндө Камбаратин ГЭС-1дин курулушуна басым жасалды, ал өлкөнүн энергетикалык коопсуздугун камсыздоо жана Кыргызстандагы энергетика секторун өнүктүрүү үчүн маанилүү объект болуп саналат. Дүйнөлүк банк бул долбоорго финансылык колдоо көрсөтүүгө даяр экенин тастыктады.
Ошондой эле долбоорду ишке ашырууда социалдык жана экологиялык маанилүү аспекттер, ошондой эле туруктуу өнүктүрүү боюнча эл аралык стандарттардын талаптары эске алынат.
Мындан тышкары, «Борбордук Азияда электр энергиясын регионалдык интеграциялоо жана соода (REMIT)» программасы талкууланды, ал Джалал-Абад облусунда электр тармактарын өнүктүрүүгө, региондогу электр энергиясынын соодасын кеңейтүүгө, ошондой эле Борбордук Азиянын энергетикалык инфраструктурасынын ишенимдүүлүгүн жана өткөрүү жөндөмдүүлүгүн жогорулатууга багытталган.
Талкуунун жыйынтыгы боюнча тараптар энергетика секторунун туруктуу өнүгүшүнө, ири инфраструктуралык долбоорлорду ишке ашырууга жана регионалдык энергетикалык кызматташтыкты тереңдетүүгө багытталган конструктивдүү кызматташууга даяр экенин билдиришти.
Эки тараптуу жыйынга катышты: энергетика министри Т.Ибраев, энергетика компанияларынын өкүлдөрү, Наджи Бенхассин — Дүйнөлүк банктын Борбордук Азия боюнча регионалдык директору, Хью Ридделл — Кыргызстандагы Дүйнөлүк банктын кеңсесинин башчысы, Стефани Гил-Практикис - Европа жана Борбордук Азия үчүн энергетика жана казып алуу тармагы боюнча менеджер, ошондой эле Дүйнөлүк банктын башка өкүлдөрү.
