Парламенттин басма сөз кызматынын маалыматына караганда, иш-чаранын жүрүшүндө ал билим берүү тармагын өнүктүрүү жана мугалимдерди колдоо маселелерин талкуулаган. Маматалиев быйыл мугалимдердин айлык акысы жогорулашы пландалып жатканын белгиледи, бирок бул болгону башталышы гана.
«Биз быйыл мугалимдердин айлыктарын жогорулатууга ниеттенип жатабыз. Бирок биздин аракеттер бул жерде токтоп калбайт. Жогорку Кеңеш өз ыйгарым укуктарынын алкагында билим берүүнү өнүктүрүүгө жана мугалимдердин эмгек шарттарын жакшыртууга көмөктөшүүчү мыйзамдык базаны бекемдөө боюнча иштерин улантат. Биз ушул максатка жетүүгө жардам берген бардык демилгелерди колдойбуз. Тиешелүү мыйзамдарга өзгөртүүлөрдү киргизүү убактысы келди, бул убакыттын муктаждыгы», – деп баса белгиледи ал.
Мындан тышкары, спикер мектеп окуучуларынын катышуусундагы инциденттерге комментарий берип, жаштарды тарбиялоодо жоопкерчилик мугалимдердин гана мойнунда болбошу керектигин айтты.
«Тарбиянын негизин үй-бүлөдө калыптандыруу маанилүү. Эгер бул процесске ата-энелер, мугалимдер жана коомчулук тартылса, биз мыкты муунду тарбиялай алабыз», - деп кошумчалады Маматалиев.
