Билим министрлигинин басма сөз кызматынан билдиришкендей, визиттин алкагында министр борбордун имаратын жана анын жумушчу кабинеттерин, ошондой эле жанаша жайгашкан аймакты карап чыкты. Ошондой эле мекеменин кызматкерлери менен жыйын өткөрүлдү.
Жыйынына министрликтин тиешелүү башкармалыктарынын жетекчилери, борбордун өкүлдөрү, ошондой эле Кыргыз билим берүү академиясынын жана №20, №91, №94 кесиптик лицейлеринин делегаттары катышты.
Жыйын учурунда борбордун учурдагы ишмердүүлүгү тууралуу маалымат берилди, андан кийин министр анын ишин жакшыртуу боюнча бир катар көрсөтмөлөрдү берди. Негизги милдеттерге: шахмат секциясын киргизүү үчүн так план түзүү, педагогдор үчүн методикалык коштоону иштеп чыгуу, мугалимдердин квалификациясын жогорулатуу, окуучулар жана мугалимдер үчүн спартакиадаларды уюштуруу, ошондой эле санариптик көндүмдөрдү өнүктүрүү кирет.
Кендирбаева борбордун имараты капиталдык оңдоону талап кыларын белгилеп, бул боюнча тиешелүү мамлекеттик органдарга расмий кат жөнөтүлөөрүн айтты.
«Мугалимдерди даярдоо жана физикалык тарбия боюнча даярдык борборун түзүү зарыл. Мектепке чейинки жана жалпы билим берүү мекемелерин камтыган саясат, стратегия жана тиешелүү көрсөтмөлөрдү иштеп чыгуу маанилүү. Ошондой эле интеллектуалдык жана улуттук оюндар аркылуу кичинекей балдарды өнүктүрүү методикаларын иштеп чыгуу керек», — деп кошумчалады министр.
Визитинин соңунда Кендирбаева №20 кесиптик лицейдин окуу корпусу, аймагы жана жатаканасы менен таанышып, окуу процессине катышты. Башкарууга билим берүү ишмердүүлүгүн жакшыртуу боюнча сунуштар берилди.
