Талап кылынган өзгөртүүлөр соттолгондордун кармалышынын шарттары, алардын эмгегин уюштуруу, режимдер арасында которуу процедуралары, пенитенциардык мекемелердин ыйгарым укуктары жана укук коргоо органдарынын кызматкерлерине коюлган талаптар боюнча эрежелерди комплекс түрүндө жаңылоого багытталган.
Жазык-аткаруу кодексине сунушталган негизги сунуштардын арасында:
- соттолгондорду жеңилдетилген шарттарга которуу үчүн талап кылынган минималдуу мөөнөттү 15 жылдан 10 жылга кыскартуу;
- акча төлөнүүчү жана акча төлөнбөгөн жумуштарга тартуу үчүн уруксат берилген сааттардын санын көбөйтүү;
- соттолгондордон турган ыктыярдуу кеңештердин мүчөлөрүнүн эмгек акысынын төлөнүшү;
- терроризм жана экстремизм үчүн соттолгондордун кармалышынын шарттарын күчөтүү, жеңилдетилген режимге которуу мүмкүнчүлүгүн четтетүү;
- өзгөчө режимдеги мекемелерден которуу эрежелерин тактоо;
- ар түрдүү кармалыш режимдери үчүн телефон чалуулары, жолугушуулар жана өткөрүүлөрдүн саны боюнча нормаларды кеңейтүү.
Пенитенциардык система тууралуу мыйзамга киргизилүүчү өзгөртүүлөр төмөнкүлөрдү камтыйт:
- түзөтүү мекемелерин коргоо милдетин расмий түрдө бекитүү;
- коргоо жана конвойлоо менен шугулданган бөлүмдөрдүн аталышын өзгөртүү жана ведомстволук структура боюнча формулировкаларды жөнөкөйлөтүү.
Укук коргоо органдарындагы кызмат тууралуу мыйзамга киргизилүүчү өзгөртүүлөр төмөнкүлөрдү камтыйт:
- кайсы бир учурларда кызматка кабыл алуу үчүн конкурс өткөрүүнү токтотуу;
- башчыларынын сунушу боюнча кызматкерлерди илгерилетүүгө мүмкүндүк берчү жаңы норманы киргизүү;
- жумуштан бошотуу үчүн негиздерди тактоо, анын ичинде кызматкердин жакын туугандарынын оор кылмыштар үчүн соттолгондугу же уюшкан кылмыштуулук менен байланыштары аныкталган учурларды камтуу.
