Нурали кичинекей кезинен бери бул музыкалык аспапка кызыгып, улуттук маданиятты айланасындагылар менен бөлүшүүгө умтулат.
«Жети жыл мурун мен биринчи жолу комузду колума алдым. Бул убакыт ичинде көп жерлерди көрдүм, ар кандай конкурстарга катыштым жана олуттуу жетишкендиктерге жеттим. Өткөн жылы мен окуумду ийгиликтүү аяктап, диплом алдым. Азыр мен квалификациямды жогорулатуу менен алектенем. Комуздун жардамы менен, үмүттөнөм, Түркияга баруу мүмкүнчүлүгүбүз болот. Түрк эли комузду чын эле жогору баалайт жана кыргыздардын тамырлары тууралуу билет. Алар үчүн бул сыймыктуу аспап, жана алар кыргыз элине чоң урмат менен мамиле кылышат», - деди жаш музыкант.
Нурали ошондой эле бир нече ири конкурстарга катышканын, анын ичинде «чопо чоор» номинациясындагы сыйлык алганын белгиледи. Учурда ал «Достук шаңы» эл аралык конкурсуна катышып, өзүнүн жөндөмдөрүн көрсөтүүдө.
«Комуз биз үчүн жөн гана аспап эмес. Алгач кыргыздар жөнүндө сөз болгондо, Манас ата эске түшөт, андан кийин гана комуз. Бул чын эле биздин элдин символу. Комузда ойноп көргөн адам анын терең маанисин жана руханий күчүн түшүнөт», - деп кошумчалады ал.
Комузда ойноп үйрөнүү анын үй-бүлөсүнүн жашоосунда маанилүү орунду ээлейт. Анын атасы жана көптөгөн туугандары да ушул аспапта ойношот, бул анын кызыгуусун күчөтөт.
«Балалык кезимде мен «Манас» эпосунун фрагменттерин айтып, күрөш жана арифметика боюнча конкурстарга катышкам. Мындан тышкары, мен кыл кыяк жана фортепиано ойноону үйрөндүм. Учурда гитарада ойноп үйрөнүп жатам. Азыр мен 40тан ашык мелодияны билем. Сахнада негизгиси - тынчсызданбоо, болбосо адашып калуу мүмкүн», - деди Нурали.
Үй-бүлөнүн колдоосу жаш музыканттын жетишкендиктеринде маанилүү роль ойнойт. Ал ошондой эле өзүнүн мугалими Назгүл Жөлөгөновага эмгеги жана ишеними үчүн ыраазычылык билдирди.
Учурда Нурали Карыбек уулу Акматаалы атындагы орто мектепте 8-класста окуп жатат жана туулган аспабын даңазалап, дүйнөнү кыргыз мадияты менен тааныштыруу пландарын түзүүдө.
