«Таалим-Форум» коомдук фонду тарабынан берилген маалыматтарга ылайык, 2025-жылы жаштар жана өспүрүмдөр арасында кибербуллинг жана санариптик жек көрүү боюнча изилдөө жүргүзүлгөн. Анкета 12ден 25 жашка чейинки 2 096 катышуучуну камтып, өлкөнүн бардык региондорунда, Бишкек жана Ош шаарларын кошо алганда, 128 билим берүү мекемесинен алынган.
Изилдөөнүн жыйынтыктарына ылайык, акыркы жылда ар бир экинчи жаш адам онлайн-агрессиянын курмандыгы болгон, жана кээ бирлери үчүн бул терс көрүнүш адатка айланган.
Изилдөөдө реалдуу жашоодогу буллинг менен онлайн-агрессиянын байланышы да каралган. Мектептеги конфликттердин санариптик мейкинге өтүшү жаштардын психоэмоционалдык абалына терс таасирин тийгизет деп аныкталган.
Талкууга катышуучулар билим берүү мекемелеринде коопсуз санариптик мейкиндикти түзүү боюнча бир катар сунуштарды беришти. Алардын катарында нормативдик базаны жаңылоо, «кибербуллинг» терминдин юридикалык аныктамасын берүү жана интернетте балдарды коргоо боюнча улуттук стратегияны иштеп чыгуу бар.
Ошондой эле санариптик маданиятты калыптандыруу, санариптик этика боюнча программаларды киргизүү, интернетте коопсуз жүрүм-турум боюнча мугалимдерди жана психологдорду даярдоо, ошондой эле окуучуларга психологиялык колдоо көрсөтүү зарылдыгына көңүл бурулду.
Балдар арасында кибербуллингди азайтуу үчүн мектептер, үй-бүлөлөр жана санариптик платформалардын күчүн бириктирүү зарылдыгы баса белгиленди. Учурда «Таалим-Форум» коомдук фонду жаштар арасында кибербуллингди аныктоо, алдын алуу жана жооп берүү боюнча мугалимдер үчүн практикалык колдонмо түзүү боюнча иш алып барууда.
