Курамы 6-микрорайондо жайгашкан батирине 19-февралда саат 14:00 чамасында бир нече аялдар алдамчылык менен кирип келгенин айтып, шаар тургуну укук коргоо органдарына кайрылган. Уурулуктун натыйжасында 120 миң сом, 150 евро жана бир нече алтын буюмдар: шакек, нике шакеги, сырга жана чынжыр уурдалган.
Бул окуя Кыргыз Республикасынын Кылмыш-жаза кодексинин 205-беренеси ("Уурулук") боюнча катталган.
Укук коргоо органдары эки шектүүнү кармашты: 1985-жылы туулган А.Г. жана 1993-жылы туулган И.Т. Алар убактылуу кармоо жайына жайгаштырылды.
Тергөө иш-чараларынын жүрүшүндө кармалгандардын башка кылмыштарга да тиешеси болушу мүмкүн экени аныкталды. Полиция бул шектүүлөрдүн башка жабырлануучулары болушу ыктымал экенин четке какпайт. Ошондуктан укук коргоо органдары бул шектүүлөрдүн жабырлануучусу болгон же кандайдыр бир маалыматка ээ адамдарды 0(706) 93-96-96, 0(995) 95-09-40 же 102 номерлери боюнча байланышууга чакырат.
