Жолугушууну министрдин орун басарлары Бакытбек Кадыралиев жана Темирбек Эркинов жетектешти. Талкуунун негизги максаты – тажрыйба алмашуу, эл аралык медициналык практикаларды талдоо, кадрларды даярдоо жана саламаттык сактоодо цифрлаштыруу, ошондой эле чет өлкөдөгү мекендештердин Кыргызстандагы саламаттык сактоо системасын жакшыртууга катышуу жолдорун карап чыгуу болду.
Конференциянын катышуучулары чет өлкөдөгү алдыңкы клиникалардагы жетишкендиктери менен бөлүшүп, Кыргызстандагы медициналык тармакты жакшыртуу боюнча идеяларын сунушташты. Жаңы технологияларды, анын ичинде бронхоскопия жана NGS-диагностика, цифрдык чечимдерди киргизүү, ошондой эле онкологиялык, пульмонологиялык, трансплантологиялык жана анестезиологиялык жардамды жакшыртуу сыяктуу ар түрдүү аспектилер талкууланды. Ошондой эле гемодиализ, мобильдик клиникалар, лицензиялоону жеңилдетүү жана медициналык кадрларды даярдоо маселелери да көтөрүлдү.
Көптөгөн сунуштар кадрдык маселелерге байланыштуу болду. Специалисттер кыргыз врачтарын даярдоодо жардам берүүгө, стажировкаларды уюштурууга, лекциялар жана эксперттик докладдарды өткөрүүгө, ошондой эле операциялар жана мастер-класстар үчүн профессорлорду тартууга даяр экендиктерин билдиришти. Мындан тышкары, адистердин Кыргызстанга кайтып келүүсүнө жана профессионалдык долбоорлорго катышуусуна шарттарды түзүү жолдору талкууланды.
Министрдин орун басарлары чет өлкөдөгү врачтардын катышуусу медицина үчүн маанилүү ресурс экенин белгилешти. Сунушталган чаралардын катарында кыргыз врачтарынын жыш жайгашкан өлкөлөрүндө бетме-бет жана онлайн-жолугушууларды өткөрүү, Миррахимов окууларына катышуу мүмкүнчүлүгү жана цифрдык жана кадрдык реформаларга активдүү катышуу сунушталды.
Акырында Бакытбек Кадыралиев Саламаттык сактоо министри Каныбек Досмаметовдун атынан катышуучуларга ыраазычылык билдирди, мамлекет чет өлкөдө иштеп жаткан мекендештер менен профессионалдык байланыштарды сактоого кызыкдар экенин белгиледи.
«Медицинанын негизги көйгөйлөрүнүн бири – кадр жетишсиздиги. Биз кызматташууга ачыкпыз жана бейтаптарыбыздын кызыкчылыгы үчүн тажрыйба, билим жана технологияларды тартуу боюнча практикалык чечимдерди издейбиз», - деп кошумчалады ал.
