Саламаттык сактоо министрлигин жетектеген Каныбек Досмамбетов АКШнын Кыргызстандагы Чрезвычайный жана Ыйгарым укуктуу элчиси Лесли Вигери менен жолугушуу өткөрдү.
Саламаттык сактоо министрлигинин маалымат кызматынын билдирүүсүнө ылайык, сүйлөшүү учурунда медицина тармагындагы кызматташтыктын ар кандай аспекттери, анын ичинде коомдук саламаттыкты сактоо, оорулардын алдын алуу, медициналык кадрларды даярдоо жана заманбап технологияларды киргизүү боюнча тажрыйба алмашуу талкууланды.
Жолугушууда ошондой эле саламаттык сактоо инфраструктурасын өнүктүрүү алкагында Бишкекте медициналык шаарча куруу планы иштелип жаткандыгы белгиленди. Бул долбоордо белгилүү америкалык компаниялардын продукциясын камтыган заманбап медициналык жана лабораториялык жабдууларды сатып алуу мүмкүнчүлүгү каралган. Кыргызстандын адистеринин АКШда билим алуусуна жана стажировкасына өзгөчө көңүл бурулду.
Такталган меморандумга ылайык, Америка Кошмо Штаттары үч негизги багытка көңүл бурууну пландаштырууда:
- ВИЧ менен жашаган адамдар үчүн медициналык кызматтарга жана дары-дармектерге жеткиликтүүлүктү камсыз кылуу;
- туберкулез менен күрөшүү боюнча улуттук программаны колдоо;
- санитардык-эпидемиологиялык даярдыкты бекемдөө.
Тараптар саламаттык сактоо тармагында, эпидемиологиялык коопсуздукту жогорулатууда, инфраструктураны модернизациялоодо, коммерциялык кызматташтыкта жана медициналык кадрларды даярдоодо биргелешип иштөөнү улантууга даяр экендиктерин билдиришти.
