Иш-чарада сунушталган маалыматка ылайык, мастер-план Кыргызстан менен Казакстандын аймагын камтыйт жана туристтик кластерлерди өнүктүрүүгө, транспорттук байланыштарды жакшыртууга жана ушул коридор боюнча долбоорлорго инвестиция тартууга багытталган.
Презентацияда ар кандай ведомстволордун өкүлдөрү: Экономика жана соода министрлиги, Туризм департаменти, ошондой эле Чүй жана Ысык-Көл облустарынын администрациялары, бизнес жана эл аралык уюмдардын өкүлдөрү катышты.
Бул планнын биринчи версиясы 2019-жылы бекитилген. Жаңыланган версия пандемиядан кийинки туристтик рыноктогу өзгөрүүлөрдү эске алат жана туруктуу өнүгүүгө багытталган жаңы элементтерди камтыйт.
Мастер-планда белгиленген негизги багыттардын арасында:
- экотуризмди өнүктүрүү жана экологиялык туруктуу инфраструктураны түзүү;
- жаңылануучу энергия булактарын киргизүү жана көмүртек изин азайтуу;
- чек арадагы процедураларды санариптештирүү жана транспорттук байланыштарды жакшыртуу;
- чек ара аралык туристтик маршруттарды түзүү.
Круглый столдо катышуучулар приоритеттүү инициативаларды жана мүмкүн болгон негизги долбоорлорду талкуулашты. Бул мастер-планды ишке ашыруу эл аралык финансылык институттардан, мамлекеттерден жана жеке сектордон инвестиция тартууга мүмкүнчүлүк берет деп болжолдонууда.
Алматы — Бишкек экономикалык коридору Борбордук Азияда регионалдык интеграция жана туризмди өнүктүрүү үчүн эң маанилүү долбоорлордун бири катары каралууда.
