Бүгүнкү күндө Кыргызстанда 40 соода-логистикалык борбор иштеп жатат, бул тууралуу Су ресурстары, айыл чарба жана кайра иштетүү өнөр жайы министрлиги билдирет.
Бул борборлор же кайра иштетүү ишканаларынын жанында иштейт, же продукцияны экспорттоо менен алектенген көз карандысыз структуралар катары иштейт. Учурда өлкөдө ири жана орто категорияларга тиешелүү 483 кайра иштетүү өнөр жайы ишканасы катталган.
Ар бир соода-логистикалык борбор заманбап складдык жайлар жана чийки зат менен даяр продукцияны сактоо жана тоңдуруу үчүн арналган атайын блоктор менен жабдылган. Мында ошондой эле айыл чарба продукциясын ороо, белгилөө, сертификаттоо жана транспорттоо иштери жүргүзүлөт.
Министрликтин божомолдоруна ылайык, 2026-жылы 75 жаңы кайра иштетүү өнөр жайы ишканасын ачуу пландалууда, алардын арасында 8 жаңы соода-логистикалык борбор болот.
Стратегиялык өнүктүрүү программасына ылайык, 2030-жылга чейин өлкөдө дагы 40 соода-логистикалык борбор курулат.
Министрлик мындай объектилерди түзүү экспорт-импорт операцияларынын агымдарын эффективдүү башкарууга, ошондой эле айыл чарба продукциясын сактоого, кайра иштетүүгө жана бөлүштүрүүгө багытталганын белгилейт.
Соода-логистикалык борборду түзүү процессинде бир нече негизги этаптар бар. Алгач долбоордун максаттары жана милдеттери аныкталат, ишке ашыруу үчүн орун тандалат, андан кийин бизнес-модель иштелип чыгат. Андан соң участоктун жана инфраструктуранын планы даярдалып, курулуш үчүн зарыл болгон уруксаттар алынып келет.
Курулуш этапында складдык жана административдик имараттар курулат, заманбап жабдуулар жана ИТ-истемалар орнотулат. Андан кийин товарларды кабыл алуу, сактоо жана жүктөө процессин оптималдаштыруу, электрондук документ жүгүртүү системаларын жана кардарлар үчүн санариптик кызматтарды киргизүү иштери жүргүзүлөт.
Ошондой эле кызматкерлерди тандоого жана окутууга, мотивациялык механизмдерди жана иштин натыйжалуулугун баалоо системаларын (KPI) киргизүүгө көңүл буруу маанилүү. Транспорттук компаниялар жана бөлүштүрүү тармактары менен кызматташтык орнотулат, ошондой эле мамлекеттик органдар менен байланыш бекемделет.
Курулуш аяктагандан кийин жаңы борборлор алардын функционалдуулугун баалоо үчүн тесттик эксплуатациядан өтөт. Кийинчерээк кызматтардын спектрин кеңейтүү жана автоматташтыруу процессин, электрондук сооданы жана блокчейн негизиндеги чечимдерди киргизүү пландалууда.
