Кыргыз Республикасында Экономика жана соода министрлигинин базасында жергиликтүү ишкерлерге экспорттук документтерди даярдоодо кыйынчылыктарга туш болгон учурда колдоо көрсөтүү максатында оперативдик штаб иштеп жатат. Бул тууралуу «Кыргыз экспорт» экспортту өнүктүрүү жана илгерилетүү борборунун директору Урмат Такиров ИА «Кабар» өткөргөн пресс-конференцияда билдирди.
Такировдун белгилөөсү боюнча, штабды түзүү Россия Федерациясынын Федералдык бажы кызматынын мобильдик топторунун Казакстан менен чек араларда пайда болушу менен зарыл болуп калды. «Евразия экономикалык биримдигинин алкагында күчүнө кирген жаңы талаптар экспорттук документтерди даярдоодо көбүрөөк детализацияны талап кылат, бул бир катар ишкерлер үчүн кыйынчылыктарды жаратат», - деп түшүндүрдү ал.
Оперативдик штаб Экономика жана соода министрлигинин имаратында жайгашкан жана күн сайын 19:00гө чейин иштейт.
Ишкерлер жардамга тез жетүү үчүн 0 550 305 305 номерине чалып, Россияга экспорттоо үчүн документтерди даярдоодо көйгөйлөр болсо консультация жана колдоо ала алышат.
«Консультацияларга кошумча, штаб экспорттук документтерди туура даярдоо боюнча окутуучу семинарларды уюштурат. Мындай иш-чаралар Бишкек жана Ошто өткөрүлүп, 740 катышуучуну чогултту», - деп кошумчалады ал.
Окутуу ар кандай мамлекеттик органдардын өкүлдөрү, анын ичинде салык жана бажы кызматтары менен кызматташтыкта өтүүдө. Ошондой эле семинарларга «Честный знак» маркировка системасынын адистери тартылып, ЕАЭБ өлкөлөрүнө экспорттоо үчүн товарларды маркировкалоо боюнча талаптарды түшүндүрүшөт», - деди директор.
Ведомстводо оперативдик штабдын негизги максаты - бизнес үчүн административдик тоскоолдуктарды азайтуу жана кыргызстандык компанияларды тышкы рыноктордо колдоо экенин белгилешет.
