Өкмөт башчысы армиянын авто паркынын жаңыланышы мобилдүүлүктү жана Куралдуу күчтөрдүн аракеттерге даярдыгын жогорулатуу максатын көздөйт деп белгиледи. Анын айтымында, заманбап аскердик түзүлүш традицияларды жана жаңы технологияларды бириктириши керек, жаңы техника аскер кызматкерлеринин коопсуз жана ыкчам кыймылын камсыздайт.
Ал ошондой эле акыркы жылдарда өлкөнүн коргонуу жөндөмдүүлүгү кыйла күчөгөнүн кошумчалады.
Кыргызстандын Куралдуу күчтөрүнүн бюджети 2018-2019-жылдардагы мезгилге салыштырмалуу 300% дан ашык көбөйдү.
Бөлүнгөн каражаттар курал-жаракты модернизациялоого, аскер бөлүктөрүнүн инфраструктурасын өнүктүрүүгө, ошондой эле заманбап абадан коргонуу жана радиоэлектрондук күрөш каражаттарын сатып алууга багытталууда.
Адылбек Касымалиев ошондой эле Коргоо министрлигинин системасында электрондук документ жүгүртүүнүн биринчи этабы аяктаганын билдирди. Азыркы учурда аскерлердин электрондук эсепке алуусу беш аскер комиссариатында пилоттук режимде өтүп жатат, март айына чейин дагы 25 комиссариатта ишке киргизүү пландалууда. Ал аскер билеттерин санариптештирүү башталганын белгиледи.
Ошондой эле аскер кызматкерлеринин социалдык коргоосуна өзгөчө көңүл бурулат. Бишкекте турак-жай ижарасы үчүн күндөлүк компенсациянын өлчөмү 500 сомго, ал эми региондордо 420 сомго чейин жогорулады. Ипотека боюнча ай сайын төлөмдөр киргизилди, кызмат ордуна карабай турак-жай сатып алуу мүмкүнчүлүгү берилди, ошондой эле Мамлекеттик ипотекалык компания аркылуу 900дөн ашык батир берилет.
Жалпысынан Коргоо министрлигине 81 унаа өткөрүлдү, алардын арасында 36 Chevrolet Cobalt, 19 JAC T-6 пикап, 18 «Газель» унаасы, 5 вахталык автобустар жана 3 JAC Sunray микроавтобусу бар. Бул техниканын бир бөлүгү Кыргызстандагы «Тулпар Моторс» заводунда өндүрүлгөн.
